'n Landskap van Onvergeetlike Dae

Watter dag in ‘n landskap van onvergeetlike dae is die een wat ‘n mens sal uitsonder in hierdie landstreek van die spreekwoordelike melk en heuning? Daardie deel van Frankryk wat Peter Mayle letterlik op die kaart geplaas het met die eerste van sy drie boeke daaroor, A year in Provence.

Is dit toe jy na Gordes in die verte kyk en jou eerste blik kry op wat die Franse “un village perché” noem, daardie aardkleurige geboutjies wat in ‘n vreemde maar logiese patroon van ‘n heuwelpiek af in mekaar vleg na ondertoe?

Of is dit die Saterdag wanneer jy in die straatmark in Riez luier en te midde van sterk en oorweldigende kleure en geure die bestanddele vir ‘n piekniek uitsoek? Dalk die Moedersdag wanneer jy in Avignon wakker word en die geluid van beierende kerkklokke reg buite jou kamervenster as’t ware om jou vou? Of die onvergeetlike middagete naby Moustiers-Ste-Marie waar jy by La Bastide de Moustiers kennis maak met die veelbesproke Provensaalse middagete wat uit vyf gange bestaan?

Dit kan selfs die Saterdagaand op Place Crillon wees waar die inwoners en ‘n paar verdwaalde toeriste kuier en mettertyd die simmetrie van die tientalle tafeltjies versteur deur die stoele te draai en langbeen uit te strek, gesigte na die weste gekeer, om die laaste strale van die sakkende son in te drink?

Jy kan Provence ontdek soos Peter Mayle en sy vrou gedoen het. Of jy kan jouself afsonder en soos Marita van der Vyver daar skryf. Jy kan soos ons ‘n ietsie uit die noorde, weste, ooste en suide uitsonder en Provence só probeer afbaken en smaak. Dit is alles moontlik, want selfs nadat Peter Mayle Provence in die middel jare tagtig “ontdek” het, bly dit steeds een van die mees “onontdekbare” omgewings waarvoor die deurwinterde reisiger kan hoop.

Provence is in die suidoostelike hoek van Frankryk geleë en lê teen die Mediterreense kus.

Die naam Provence dateer uit die Romeinse Ryk en dit was die Ryk se eerste provinsie buite Italië.

Die beste tyd van die jaar om Provence te besoek is aan die begin van die Suid-Afrikaanse winter wanneer die weer daar op sy lekkerste begin raak. Ietsie warms vir die koel luggie wat in die aande kan opsteek en ‘n sambreel vir die onverwagte laatmiddag-reënbui is al waarvoor jy voorsiening moet maak.

Uittreksel uit artikel : Zarine Roodt  Die Volksblad - 23 Junie 2001